اورتاغوس: من اطلاق الأسرى لترسيم الحدود
تمكنت الدولة اللبنانية من خلال عملها الديبلوماسي والاتصالات، ومن دون ضربة كف حتّى من الضغط على إسرائيل لإطلاق الأسرى اللبنانيين اللي كانت اعتقلتهن من بعد ادخال لبنان بحرب اسناد ما الو فيا كان غير انو اتدمرّت مناطق كتيرة ورحلنا ضحايا كتير وزاد الاحتلال الإسرائيلي لنقاط جديدة على الحدود اللبنانية.
من بعد اطلاق سراح الاسرى، دخلت المبعوثة الأميركية مورغان اورتاغوس من جديد على الخط، معلنة عن خطط جديدة رح يتم العمل عليها، فرح تجمع اورتاغوس لبنان وإسرائيل لإجراء محادثات بتهدف لحل دبلوماسي للعديد من القضايا العالقة متل: إطلاق سراح السجناء اللبنانيين، النقاط المتنازع عليها المتبقية على طول الخط الأزرق، والنقاط الخمس اللي منتشر فيا الجيش الإسرائيلي من بعد اتفاق وقف النار.
يعني اليوم زاد على النقاط الـ13، 5 نقاط جداد لازم نحكي ونفاوض لاستردادن. مشكورين..
الثنائي يبدو غاضين النظر عن اعلان واشنطن بدء مفاوضات الترسيم البري. لبنان أمام تحد دبلوماسي كبير، فعلى الدولة تشكيل سريعا لجان للتفاوض من دون الوقوع بأي فخ إسرائيلي وتحقيق مكاسب لصالحو بملف الحدود. فاهتمام واشنطن بلبنان والمنطقة لصالحنا اليوم. ويلي تبيّن من بعد هالحرب انو وحدها الدولة اللبنانية بتحمي لبنان واللبنانيين.
